Dk. Salim asisitiza amani, kumuenzi Mwalimu

WAZIRI Mkuu mstaafu wa Jamhuri ya Muungano wa Tanzania, Dk. Salim Ahmed Salim, ametoa wito kwa viongozi wa Afrika kuwekeza zaidi katika kulinda na kuimarisha amani, akisisitiza kuwa amani ni nguzo kuu ya maendeleo endelevu ya bara hilo.

Akizungumza jijini Dar es Salaam katika maadhimisho ya Mwaka wa Amani na Usalama Barani Afrika yaliyofanyika Septemba 21, 2010, Dk. Salim alisema bara hilo haliwezi kupiga hatua za kimaendeleo bila kuwepo kwa utulivu wa kisiasa na kijamii unaojengwa juu ya misingi ya haki na usawa.

Akinukuu falsafa za Baba wa Taifa, Mwalimu Julius Kambarage Nyerere, Dk. Salim alisema amani siyo tu kutokuwepo kwa vita, bali ni hali ya kuheshimiana, haki na uadilifu miongoni mwa wananchi. “Mwalimu alituasa kuwa amani inatokana na uongozi unaojali watu, unaosikiliza na unaoamini katika mazungumzo badala ya mapambano,” alisema Dk. Salim. SOMA: Serikali yapongezwa kumuenzi Baba wa Taifa

Alibainisha kuwa chanzo kikuu cha migogoro mingi barani Afrika ni ukosefu wa utawala bora, rushwa na ubaguzi, akisisitiza kuwa viongozi wanapaswa kuiga mfano wa Mwalimu Nyerere katika uadilifu, unyenyekevu na kujituma kwa maslahi ya wengi. Pia aliwataka vijana kuelimishwa kuhusu umuhimu wa kudumisha umoja na kuzuia migawanyiko inayoweza kuhatarisha amani.

Dk. Salim alihitimisha kwa kuwataka viongozi wa Afrika kuendelea kujifunza kutoka kwa fikra za Mwalimu Nyerere ili kujenga bara lenye umoja, usawa na maendeleo ya kweli. “Tuendelee kulinda amani kama urithi wa kizazi chetu kwa vizazi vijavyo,” alisisitiza.