Bil 3/- zahitajika kusaidia watoto wenye ulemavu
DAR ES SALAAM: HOSPITALI ya CCBRT imezindua rasmi kampeni ya kitaifa ya uchangishaji fedha yenye lengo la kukusanya Sh bilioni 3 ili kugharamia matibabu ya watoto wanaozaliwa na changamoto mbalimbali za kiafya zinazoweza kutibika nchini Tanzania.
Akizungumza katika uzinduzi wa kampeni hiyo jijini Dar es Salaam leo, Mkurugenzi Mtendaji Mkuu wa CCBRT, Brenda Msangi, amesema kampeni hiyo inayojulikana kama “Simama na CCBRT” inalenga kuhakikisha hakuna mtoto anayebaki nyuma katika kupata huduma za afya stahiki.
Amesema kila mwaka maelfu ya watoto nchini huzaliwa na changamoto zinazoweza kutibika zikiwemo miguu kifundo , mdomo wazi, ulemavu wa viungo, mtoto wa jicho wa kuzaliwa nao pamoja na mtindio wa ubongo.
“Bila kupata huduma sahihi, watoto hawa hukabiliwa na unyanyapaa, kutengwa katika jamii na wakati mwingine kuishi na ulemavu wa kudumu. Kampeni hii ni wito wa mshikamano, huruma na uwajibikaji wa pamoja,” amesema Msangi.
CCBRT imesema kampeni hiyo ya miezi mitatu inalenga kuboresha upatikanaji wa huduma za afya kwa watoto wenye changamoto za kuzaliwa nazo, hususan katika maeneo ya pembezoni.
Maeneo makuu ya kipaumbele ni pamoja na utambuzi wa mapema na rufaa, uhamasishaji wa jamii kuhusu ulemavu, pamoja na upatikanaji wa matibabu jumuishi ikiwemo upasuaji wa kurekebisha viungo, tiba ya viungo, vifaa saidizi na ufuatiliaji wa muda mrefu wa wagonjwa.
Msangi amesema CCBRT pia imesisitiza umuhimu wa elimu kwa jamii ili kupinga imani potofu zinazohusisha ulemavu na laana au ushirikina, ikisema hali hizo ni changamoto za kiafya zinazotibika kisayansi.
“Ni muhimu jamii kuelewa kuwa haya ni matatizo ya kiafya, si laana wala adhabu. Kuondoa dhana hizi kutasaidia watoto kupata matibabu mapema bila hofu au unyanyapaa,” alisema Msangi.
CCBRT, iliyoanzishwa mwaka 1994, imekuwa moja ya taasisi kubwa nchini inayotoa huduma za kibingwa na za utengamao kwa watu wenye ulemavu.
CCBRT imezitaka taasisi za serikali, sekta binafsi, mashirika ya maendeleo, vyombo vya habari na wananchi kushiriki kikamilifu katika kampeni hiyo ili kuhakikisha watoto wengi zaidi wanapata matibabu.
Pia imeipongeza Azam Media Group kwa kusaidia kusambaza ujumbe huo kupitia vyombo vyake vya habari.
“Wananchi na wadau wanaweza kuchangia kupitia NMB Bank (akaunti 23910009087) au mitandao ya simu kupitia M-Pesa, Airtel Money, Mixx by Yas na HaloPesa kwa namba ya malipo 12174228 (CCBRT FUNDRAISING) ili kusaidia ndoto za watoto wenye ulemavu,’ amesema .
