EWURA yatangaza kushuka bei ya Petroli na Dizeli

DAR ES SALAAM: MAMLAKA ya Udhibiti wa Huduma za Nishati na Maji (EWURA) imetangaza kushuka kwa bei ya petroli na dizeli kuanzia leo Desemba 6, 2023.
Taarifa ya Ewura iliyotoka usiku wa kuamkia leo imesema kuwa kushuka kwa bei hizo kunatokana na kupungua kwa bei ya bidhaa hiyo katika soko la dunia na kushuka kwa gharama za uagizaji mafuta kupitia bandari ya Dar es Salaam na Tanga.
Kwa mujibu wa EWURA, kwa mwezi huu wa Desemba, 2023 bei za mafuta (FOB) kwenye soko la dunia zimepungua kwa wastani wa 0.8 kwa mafuta ya petroli na asilimia 9.11 kwa mafuta ya dizeli.
Pia gharama za kuagiza mafuta kwa Bandari ya Dar es Salaam zimepungua kwa wastani wa asilimia 24 kwa mafuta ya petroli na asilimia 30 kwa mafuta ya dizeli huku Bandari ya Tanga gharama za kuagiza mafuta zikipungua kwa asilimia 30 kwa mafuta ya petroli na asilimia 17 kwa mafuta ya dizeli.
Taarifa hiyo ya EWURA inasema kwa mwezi Desemba 2023 bei ya mafuta ghafi zimepungua katika soko la dunia kwa wastani wa asilimia 8.7 na gharama za uagizaji wa mafuta kwa wastani wa asilimia 27 kwa petroli na asilimia 23 kwa dizeli.
“Kufuatia kupungua kwa gharama hizo sasa mafuta ya Petroli Dar es Salaam yatauzwa kwa Sh 3,158 na dizeli kwa Sh 3,226 kwa kila lita kwa bei ya rejareja kutoka Sh3,274 na Sh 3,3,74 iliyokuwapo mwezi uliopita,”imesema taarifa hiyo ya EWURA na kuongeza
“Mafuta ya taa itasalia kama ilivyokuwa mwezi uliopita Sh 3,423 kwa kila lita moja kwa mnunuzi wa rejareja,”imesema.
Kwa mujibu wa tangazo hili, bei ya rejareja kwa petroli inakuwa imepungua kwa Sh 116 na dizeli kwa Sh 148 huku mafuta yataa yakiwa hayana mabadiliko yoyote.
Kwa upande wa Tanga lita moja ya mafuta ya petroli itanunuliwa kwa Sh 3,204 huku dizeli ikinunuliwa kwa Sh 3,377 kutoka Sh 3,274 na Sh 3,510 mwezi uliopita mtawaliwa.
Mafuta ya taa katika mkoa huo yatanunuliwa kwa Sh 3,469 kwa kila lita.
Kwa watumiaji wa mafuta mkoani Mtwara watanunua kwa Sh 3,231 katika kila lita moja ya petroli na Sh 3,546 katika kila lita ya dizeli huku mafuta ya taa wakinunua kwa Sh 3,495 kwa lita.
 
 

Habari Zifananazo

1 Comment
Oldest
Newest Most Voted
Inline Feedbacks
View all comments
Back to top button