Kumuenzi Karume ni wajibu wa kila mwananchi

KILA ifikapo Aprili 7, ya mwaka Zanzibar huadhimisha Siku ya Kumbukumbu ya kifo cha Rais wa Kwanza wa Zanzibar na Mwenyekiti wa Baraza la Mapinduzi, Abeid Amani Karume. Siku hii hujumuisha matukio mbalimbali ikiwa ni pamoja na dua maalumu, na viongozi wa vyama na serikali kutembelea kaburi lake kisiwandui.

Kumbukizi ya Karume ni sehemu muhimu ya historia ya Zanzibar na Tanzania kwa ujumla, kwani alikuwa kiongozi aliyetoa mchango mkubwa katika mabadiliko ya kisiasa, kijamii na kiuchumi baada ya Mapinduzi ya Zanzibar ya mwaka 1964. Ni muhimu kwa jamii ya leo na vizazi vijavyo kumkumbuka Karume kwa njia zinazostahili ili kuthamini juhudi zake na mafanikio aliyoyaacha katika visiwa vya Unguja na Pemba.

Mchango wake unajumuisha maendeleo ya miundombinu, nyumba za makazi na jitihada za kumkomboa Mzanzibari. Hivyo, kumuenzi kunahitaji juhudi za makusudi katika kuhifadhi kumbukumbu zake za kihistoria, ikiwemo majengo, nyaraka, picha, na sanamu zinazoelezea maisha na mchango wake.

Kumbukumbu hizi ni darasa hai linaloweza kutumika kufundisha historia ya taifa na kuhamasisha uzalendo kwa vizazi vijavyo. Mfano mmoja unaotaka ulinzi zaidi ni sanamu iliyopo eneo la Hoteli ya Bwawani ambayo imeachwa bila kutunzwa.

Hali hii siyo tu inadhihirisha ukosefu wa utunzaji, bali pia inapunguza thamani ya historia katika macho ya jamii. Mamlaka husika zinapaswa kuchukua hatua za haraka kurekebisha hali hii, ikiwa ni pamoja na matengenezo ya mara kwa mara na ulinzi wa maeneo ya kihistoria ili kuzuia uharibifu zaidi.SOMA: Mzee Karume aliruhusu Wazanzibar, Waarabu kuoana

Ikiwa hoteli hiyo haiwezi kutumika, sanamu inaweza kuhamishwa kwa uangalifu na kuwekwa katika eneo linalofaa ili kudumisha hadhi yake. Vile vile, elimu kwa umma kuhusu mchango wa Karume inapaswa kuimarishwa kupitia shule, vyombo vya habari, na makumbusho ili kuhakikisha kila kizazi kinafahamu historia yake.

Kuanzishwa kwa makumbusho maalumu ya historia ya Karume kunaweza kuwa njia bora ya kuhifadhi kumbukumbu zake, kwani makumbusho hayo yanaweza kuwa na vielelezo vinavyoelezea maisha yake na mchango wake kwa taifa. Kwa sasa, ni baadhi tu ya maeneo kama Ofisi Kuu ya Chama Cha Mapinduzi (CCM) Zanzibar yanayotoa historia hiyo. Maadhimisho ya kila mwaka ya kumbukizi yake yanapaswa kupewa uzito mkubwa zaidi.

Shughuli kama mihadhara, maonesho ya picha na midahalo vinaweza kusaidia kuongeza uelewa wa jamii, hususani vizazi vipya ambavyo havina ufahamu wa kutosha kuhusu mchango wake. Aidha, jamii nzima inapaswa kushirikishwa kikamilifu katika kuhifadhi kumbukumbu hizi. Shule hasa za msingi zinaweza kuanzisha programu za ziara za kihistoria kwa wanafunzi ili kuwajengea uelewa wa vitendo kuhusu mashujaa wa taifa lao.

Wasanii wanaweza pia kumuenzi kwa njia za sanaa kama uchoraji, filamu na maigizo, hasa wakati wa maadhimisho ya kumbukizi ambayo mwaka huu ni miaka 54 tangu kifo chake. Kumbukumbu zake zinapaswa kulindwa dhidi ya uharibifu au wizi kwa kuweka mifumo ya usalama, na jamii inapaswa kuhamasishwa kuwa na utamaduni wa kuthamini historia ya taifa lao. Kumuenzi Karume si jukumu la serikali pekee, bali ni wajibu wa kila mwananchi kuhakikisha maeneo yote yanayohusiana na historia yake yanatunzwa kwa usawa.