Utulivu watakiwa kesi mgawanyo rasilimali Chadema

DAR ES SALAAM: Jopo la mawakili wa Makamu Mwenyekiti mstaafu wa Chama cha Demokrasia na Maendeleo (CHADEMA) Zanzibar, Said Issa Mohamed, limewaomba wanachama wa chama hicho kuwa watulivu wakati wakisubiri uamuzi wa mahakama katika kesi ya mgogoro wa mgawanyo wa mali na rasilimali za chama.

Kesi hiyo ya madai namba 8323 ya mwaka 2025 inahusu mgogoro wa mgawanyo wa rasilimali za chama kati ya Tanzania Bara na Zanzibar.

Shauri hilo limefunguliwa na Mohamed kwa kushirikiana na wajumbe wawili wa Bodi ya Wadhamini wa Chadema kutoka Zanzibar, Ahmed Rashid Khamis na Maulida Anna Komu.

Akizungumza jijini Dar es Salaam, Wakili waandamizi Gido Semfukwe akisaidiana na Shabaan Marijani na Alvan Fidelis, amesema kumekuwepo na dhana kwamba kesi hiyo imeletwa na kikundi cha watu wachache, jambo alilodai si sahihi.

“Ukweli ni kwamba katika shauri hili wapo viongozi waandamizi wa chama pamoja na wafuasi wengi wenye nia ya kuona chama kinakuwa mikononi mwa wanachama walio hadi ngazi za chini kabisa, si kumilikiwa na kikundi cha watu wachache,” amesema Semfukwe.

Amefafanua kuwa lengo la mashauri hayo ni kuleta uwiano sawia wa mgawanyo wa mali na ushiriki wa shughuli za kisiasa kati ya Tanzania Bara na Zanzibar, pamoja na kuhakikisha rasilimali za chama zinatumika kwa maslahi mapana ya wanachama.

Semfukwe alidai kuwa kesi hiyo itakapokuja kusikilizwa, viongozi na wanachama watashangaa kubaini namna mali na rasilimali za chama zinavyotumiwa na kufujwa na kikundi cha watu wachache, zikiwamo ruzuku, nyumba, magari, pikipiki na michango ya wanachama pamoja na wahisani kutoka nje ya nchi.

Aidha, ameitaka Mahakama inayosikiliza shauri hilo kulichukua kwa uzito na kulisikiliza kwa wakati mwafaka ili haki iweze kutendeka kwa pande zote.

Kwa upande wake, Said Issa Mohamed alisema aliamua kufungua kesi hiyo kutokana na kile alichodai kuwa kwa sasa hawezi kushiriki vikao vya uongozi wa chama. Alieleza kuwa amekuwa akiyawasilisha madai hayo tangu akiwa madarakani na hata baada ya kuondoka kwenye nafasi ya uongozi, ameendelea kupigania haki za wanachama, hususan wa Zanzibar.

Mohamed, ambaye aliwahi kuwa Makamu Mwenyekiti wa Chadema kwa takribani miaka 16, alisisitiza kuwa lengo lake ni kuona kunakuwepo usawa na uwazi katika usimamizi wa mali na rasilimali za chama hicho.