Wakimbizi waliotoroka kambini kusakwa Kigoma

SERIKALI mkoani Kigoma imetangaza kuanza operesheni maalum ya kuwasaka wahamiaji haramu wakiwemo wakimbizi wa Burundi wanaodaiwa kukimbia makambini na kuishi mtaani kinyume cha sheria za uhamiaji.

Akizungumza na waandishi wa habari, Mkuu wa Mkoa wa Kigoma Simon Sirro amesema mkoa huo unakabiliwa na ongezeko la raia wa kigeni wanaoishi bila kufuata taratibu, hali inayodaiwa kuchangiwa kwa kiasi kikubwa na baadhi ya wakimbizi kutoka Burundi. Amesema operesheni hiyo itahusisha maeneo mbalimbali ya mkoa huo, ikiwemo sehemu zinazohisiwa kuwa na vitendo vya uhalifu, wahalifu pamoja na wahamiaji haramu.

Katika kikao hicho kilichohudhuriwa na wajumbe wa Kamati ya Ulinzi na Usalama ya Mkoa, Sirro amesisitiza kuwa hatua hiyo inalenga kurejesha utulivu na kuhakikisha sheria za nchi zinafuatwa. Awali Idara ya Uhamiaji kupitia Wizara ya Mambo ya Ndani ya Nchi ilitangaza kufungwa kwa kambi ya wakimbizi wa Burundi ya Nduta iliyopo wilayani Kibondo ifikapo Machi 31 mwaka huu, ambapo wakimbizi waliokuwa wakiishi hapo wanatarajiwa kurejeshwa nchini kwao.

Hivi karibuni imeripotiwa kuwa baadhi ya wakimbizi wamekuwa wakirejea Burundi, lakini wengine wanadaiwa kutoroka na kuendelea kuishi Kigoma bila kibali halali. Serikali imeeleza kuwa operesheni hiyo itafanyika nchi kavu na ziwani ili kudhibiti hali hiyo na kuondoa vitendo vinavyoweza kuhatarisha usalama na amani ya wananchi. SOMA: Serikali: Tutunze amani tusigeuke wakimbizi