Mbunge ashauri uwekezaji zaidi NM-AIST
ARUSHA: SERIKALI imeshauriwa kuongeza uwekezaji na kutumia kikamilifu uwezo wa Taasisi ya Afrika ya Sayansi na Teknolojia ya Nelson Mandela (NM-AIST) katika tafiti, ubunifu na kubadilisha matokeo ya tafiti hizo kuwa bidhaa na huduma za kibiashara zitakazochochea maendeleo ya uchumi wa Tanzania na Afrika kwa ujumla.
Ushauri huo umetolewa na Mbunge wa Msalala, Mabula Magangila, wakati akichangia mjadala kuhusu maendeleo ya sayansi na teknolojia katika ziara ya Kamati ya Kudumu ya Bunge ya Elimu, Utamaduni na Michezo iliyotembelea taasisi hiyo kujionea shughuli za utafiti na utekelezaji wa programu ya Samia Scholarship.
Amesema NM-AIST inaaminika barani Afrika kutokana na mchango wake katika tafiti, ubunifu na kukuza uwezo wa wataalamu, hivyo Serikali inapaswa kuwekeza zaidi ili matokeo ya kazi hizo yaonekane na kunufaisha jamii.
Amesisitiza kuwa uwekezaji wa Serikali katika taasisi za sayansi na teknolojia unapaswa kuelekezwa pia katika kubuni bidhaa na teknolojia zinazoweza kuzalishwa na kuuzwa kibiashara, akieleza kuwa sekta binafsi haiwezi kuchukua nafasi ya Serikali katika uwekezaji mkubwa wa miundombinu ya utafiti.
Hata hivyo, ameshauri kuwekwa kwa mifumo itakayowezesha ushirikiano kati ya Serikali na sekta binafsi ili kuendeleza bunifu na kuzifanya kuwa fursa za kiuchumi.
Akizungumzia miundombinu ya teknolojia ya taarifa, amesema vituo vya kuhifadhi na kusimamia taarifa za kidijitali vinaweza kuwa chanzo muhimu cha mapato kwa taifa endapo vitaendelezwa kwa ushirikiano wa sekta ya umma na binafsi.
Ameeleza kuwa Tanzania inaweza kutumia miundombinu hiyo kutoa huduma za kuhifadhi na kulinda taarifa kwa taasisi za ndani na nje ya nchi, ikiwemo masoko ya Afrika na kimataifa, na hivyo kuongeza mapato kupitia mauzo ya huduma za teknolojia. Pia ameipongeza NM-AIST kwa kazi na uwekezaji unaofanyika, akisema ni msingi muhimu wa kuimarisha uwezo wa Tanzania katika sayansi, teknolojia na ubunifu.
