BSS 16 yazinduliwa mshindi kupata mil 50

MSIMU wa 16 wa tamasha la Bongo Star Search (BSS) Next Level Revolution umeanza rasmi kuandaliwa, ukitarajiwa kuanza Novemba 22, 2025, mkoani Mwanza katika ukumbi wa La Kailo Hotel. Mshindi wa kwanza wa msimu huu ataondoka na Shilingi milioni 50 pamoja na gari jipya, akiongeza motisha kwa washiriki kushindana kwa bidii.

Akizungumza na Habari Leo jijini Dar es Salaam, Mkurugenzi wa shindano, Madam Rita Paulsen, amesema kuwa msimu huu utakuwa wa kipekee kwa kuangazia vipaji mbalimbali ikiwemo uimbaji, uchoraji, sarakasi, uchekeshaji, upigaji vyombo na uchezaji. “Nimesimama kwa heshima kubwa na furaha isiyoelezeka kutambulisha rasmi msimu wa 16 wa Bongo Star Search,msimu mpya wenye sura mpya, nguvu mpya na dira mpya,” amesema Madam Rita.

Aidha, alitangaza ushirikiano wa kimkakati kati ya Benchmark 360 na Azam Media, ambao aliuona kama “ndoa ya maono” ya kukuza na kuangaza vipaji vya Afrika Mashariki na Kati kupitia jukwaa la BSS. Madam Rita alisema kuwa washiriki watatoka ndani na nje ya Tanzania, ikiwemo nchi za Kenya, Uganda, Congo, Malawi, Rwanda na Burundi.

Kwa Tanzania, mchujo wa awali utafanyika katika mikoa ya Mwanza, Arusha, Mbeya na Dar es Salaam kuanzia Novemba 22 hadi 23 (Mwanza) na Novemba 29 hadi 30 (Arusha). SOMA: BSS kufanyika Februari 28 Dar es Salaam

Kwa upande wake, Afisa Mwendeshaji wa Maudhui na Utangazaji wa Azam Media, Yahya Mohamed, alisema shindano hilo ni sehemu ya dhamira ya Azam Media kuendelea kutoa burudani bora kwa jamii. “Bongo Star Search Next Level Revolution ni uthibitisho wa dhamira yetu ya kuhakikisha burudani inawafikia Watanzania popote walipo,” amesema Yahya.

Shindano hilo litarushwa mubashara kupitia chaneli ya Sinema Zetu kwenye ving’amuzi vya Azam kila Jumapili saa 3 usiku, likiwa ni fursa ya kipekee kwa mashabiki kufuatilia kwa karibu vipaji vya kizazi kipya.