Boti yapinduka yaua watumishi 6 Kigoma

KIGOMA; WATUMISHI sita wa Idara ya Afya halmashauri ya Wilaya Kigoma mkoani Kigoma wamekufa, baada ya boti waliyokuwa wakisafiria kutoka Kigoma Mjini kuelekea Kijiji cha Kagunga, Halmashauri ya Wilaya Kigoma kwa shughuli ya kutoa chanjo kukumbwa na dhoruba Ziwa Tanganyika na kupinduka.

Mkuu wa Jeshi la Zimamoto na Uokoaji Mkoa Kigoma, Michael Maganga alisema kuwa tukio hilo lilitokea majira ya saa mbili asubuhi leo Machi 13, 2026 Kijiji cha Kalalangabo Manispaa ya Kigoma Ujiji na kwamba miili hiyo sita imepatikana.

Taarifa za awali ambazo Daily News Digital ilizipata mapema leo na kuzisambaza kutoka eneo la tukio zilisema mtumbwi ulipinduka na kuua watumishi hao, lakini kwa mujibu wa Maganga iliyopinduka ni boti.

Maganga amesema watu wengine tisa ambao pia walikuwa kwenye boti hiyo wameokolewa na kwa sasa wanapatiwa matibabu katika Hospitali ya Rufaa ya Mkoa Kigoma Maweni, huku juhudi za kutafuta watu watatu walikuwa pia kwenye boti zikiendelea.