Alama isiyofutika filamu za bongo

LEAH Mwendamseke maarufu kama Lamata alizaliwa na kukulia mkoani Mbeya, Tanzania, na tangu utotoni alionyesha kipaji cha kipekee cha kuandika na kusimulia hadithi zinazogusa maisha ya kila siku ya jamii yake. Malezi yake katika mazingira ya kawaida yalimjengea uelewa wa changamoto, furaha na mapambano ya watu wa tabaka la chini na la kati mambo ambayo yamekuwa msingi wa kazi zake za filamu na tamthilia.

Shule na vikundi vya maigizo viliendelea kukuza kipaji chake ambapo alijifunza uandishi wa miswada, uongozaji na utayarishaji wa filamu akijijengea ujuzi wa kuandika simulizi zenye mvuto na kuongoza wasanii kwa weledi. Lamata ni mtu anayeheshimu familia akitambua mchango wake kama chachu ya mafanikio yake huku akisisitiza maadili ya nidhamu, juhudi na uthubutu katika kazi zake.

Mbali na filamu, Lamata anapenda kusoma, kujifunza mbinu mpya za utayarishaji na kuendeleza vipaji vya vijana chipukizi katika tasnia ya filamu mara nyingi akiwa mstari wa mbele kuwashauri waandishi na waigizaji. SOMA: Mimi Mars arudi mazima kwenye filamu

Tamthilia yake maarufu, “Jua Kali”, imeeleza maisha ya kawaida ya Watanzania, changamoto zao za kila siku, uhusiano, ndoa na masuala ya kijamii kwa mtazamo wa kijamii unaogusa huku stori zake zikivutia watazamaji kwa ubunifu wa kutojaliwa mapema kwa mafumbo na matatizo ya wahusika.

Kazi zake zimemletea Lamata tuzo nyingi za kitaifa na kimataifa, ikiwemo Mwongozaji Bora wa Filamu, Muswada Bora wa Tamthilia, na tuzo za Magic Vibe Awards kama Best East African TV Series na Film Director of the Year kupitia “Jua Kali”, ikithibitisha mchango wake mkubwa katika tasnia ya filamu nchini Tanzania.

Kwa ubunifu wake na mtazamo wa kijamii, Lamata anachukuliwa kuwa kielelezo cha mwongozaji na mtunzi wa filamu anayetekeleza mabadiliko akichangia kukuza vipaji vipya vya wasanii na kutoa elimuya jamii kupitia hadithi na kuimarisha filamu za kitanzania kimataifa.