Maabara mpya kuimarisha ulinzi rasilimali za bahari
DAR ES SALAAM: WAZIRI wa Mifugo na Uvuvi, Balozi Dk Bashiru Ally Kakurwa, amezindua maabara ya Taasisi ya Utafiti wa Uvuvi Tanzania (TAFIRI) inayolenga kufanya utafiti kuhusu ongezeko la asidi baharini na athari zake kwa viumbe hai, hatua inayotarajiwa kuimarisha msingi wa kisayansi wa maendeleo endelevu ya uchumi wa buluu nchini.
Uzinduzi wa maabara hiyo umefanyika leo, Oktoba 9, 2026, katika Makao Makuu ya TAFIRI yaliyopo Kunduchi, jijini Dar es Salaam, ambapo uwekezaji huo unalenga kuongeza uwezo wa Tanzania katika kulinda rasilimali za bahari, kuboresha maamuzi ya uwekezaji katika uchumi wa buluu na kudumisha manufaa ya kiuchumi na kijamii yanayotokana na rasilimali hizo.
Maabara hiyo ni sehemu ya juhudi za kuendeleza Mpango wa Kitaifa na Kimataifa wa Utafiti wa Ongezeko la Asidi Baharini ulioanzishwa mwaka 2019, ambao umewezesha ukusanyaji wa taarifa kuhusu mabadiliko ya hali ya maji ya bahari na athari zake kwa viumbe wa baharini.
Kupitia maabara hiyo, wanasayansi wa TAFIRI watafanya majaribio ya kisayansi kuchunguza athari za ongezeko la asidi baharini, kupanda kwa joto la maji na kupungua kwa kiwango cha oksijeni majini, hali zinazohusishwa na mabadiliko ya tabianchi. Tafiti hizo zitasaidia kubaini viumbe vilivyo katika hatari zaidi na kutathmini hatua za kuongeza ustahimilivu wao, hususan katika shughuli za ufugaji wa viumbe wa majini.
Akizungumzia umuhimu wa maabara hiyo, Mkurugenzi Mkuu wa TAFIRI, Dk Ismael Kimirei, amesema watafiti wanatarajia kubaini aina za viumbe wa majini zinazoweza kustahimili ongezeko la asidi baharini, joto la maji na upungufu wa oksijeni. Matokeo hayo yatawasaidia wavuvi na wafugaji kuchagua shughuli za uzalishaji zinazofaa mazingira yao.
Amesema ongezeko la asidi baharini linatokana kwa kiasi kikubwa na kufyonzwa kwa hewa ya kaboni dioksidi na maji ya bahari, hali inayoweza kuathiri ukuaji na uhai wa viumbe mbalimbali, hususan wale wanaotegemea calcium carbonate kuunda magamba na mifupa yao.
Dk Kimirei ameongeza kuwa wataalamu watafanya majaribio kwa viumbe kama kaa, kamba, chaza na mwani ili kubaini aina zinazoweza kustahimili mabadiliko ya mazingira ya bahari. Taarifa zitakazopatikana zitatumika kutoa ushauri kwa wananchi kuhusu viumbe wanaofaa kufuga au kulima katika maeneo yao.
Kwa upande wake, Meneja wa Uhifadhi wa Maeneo ya Bahari na Pwani wa Shirika la Kimataifa la Uhifadhi wa Mazingira (IUCN) nchini Tanzania, Joseph Olila, amesema programu hiyo imegharimu takribani shilingi milioni 500, ambapo shilingi milioni 151 zimetumika katika ujenzi na ununuzi wa vifaa vya maabara.
Olila amesema programu hiyo pia inahusisha matumizi ya maboya ya utafiti yanayosaidia kufuatilia mabadiliko ya hali ya bahari.
Ameeleza kuwa programu hiyo inatekelezwa kwa ushirikiano kati ya IUCN na Serikali kupitia TAFIRI, kwa ufadhili wa Ubalozi wa Ireland nchini Tanzania, ikiwa na lengo la kuimarisha uwezo wa nchi kufuatilia mabadiliko ya mazingira ya bahari na kutumia matokeo ya tafiti katika kufanya maamuzi sahihi kuhusu usimamizi wa rasilimali za bahari na maendeleo ya uchumi wa buluu.
