Elimu wataalamu wa afya ni uwekezaji-Prof Msofe

MKURUGENZI wa Elimu ya Juu kutoka Wizara ya Elimu, Sanyansi na Teknolojia Profesa Peter Msofe amesema kuimarishwa kwa elimu ya wataalamu wa afya, hakuboreshi ujuzi pekee bali  ni uwekezaji mkubwa wa mustakabali wa huduma za afya nchini.

Akizungumza leo Agosti 26, katika Kongamano la Kubadilisha Elimu ya Taaluma za Afya (THET) na Uzinduzi wa Chuo cha Walimu Tanzania (THEA) Prof Msofe amesema ubora wa utoaji huduma za afya unahusishwa na ubora wa elimu wanayopokea wataalamu.

Akizungumzia uboreshaji wa udahili wa wanafunzi katika ngazi zote, Prof Msofe amesema serikali imejitahidi kufanya hivyo kuanzia shule za msingi, sekondari na taasisi za elimu ya juu ili kukabiliana na hali mbaya ya uandikishaji na uwiano wa jumla.

Mkurugenzi wa Elimu ya Juu kutoka Wizara ya Elimu, Sanyansi na Teknolojia Profesa Peter Msofe akizungumza na waandishi wa habari, kulia ni Makamu Mkuu wa Chuo cha MUHAS, Profesa Appolinary Kamuhabwa

SOMA: MUHAS watakiwa kujenga uwezo ufanyaji utafiti

“Kupanuka kwa kasi kwa elimu ya juu nchini Tanzania kwa kuchochewa na Mpango wa Maendeleo ya Elimu ya Juu, kwa hakika kumefungua fursa mpya kwa wanafunzi wengi. Hata hivyo, kuongezeka kwa uandikishaji na kuenea kwa taasisi za elimu ya juu (HLIs) kumezua wasiwasi kuhusu uwezekano wa maelewano katika ubora wa elimu,” amesema Prof Msofe.

Amesema kuwa licha ya dhamira njema na hitaji la haraka la kupanua nguvu kazi ya afya, wasiwasi juu ya ubora wa wahitimu ulitolewa na wadau mbalimbali likiwemo mabaraza ya kitaaluma na kupendekeza haja ya kutumia mbinu bunifu ili kuhakikisha ukuaji wa elimu ya juu hauji kwa gharama ya viwango vya elimu vya taaluma za afya.

Prof Msofe amekipongeza Chuo Kikuu cha Afya na Sayansi Shirikishi Muhimbili (MUHAS), Chuo Kikuu cha Kikatoliki cha Afya na Sayansi Shirikishi (CUHAS) na Chuo Kikuu cha Tiba cha Kilimanjaro Christian Medical University (KCMUCo) kwa kushirikiana na Chuo Kikuu cha Duke na Chuo Kikuu cha California San Francisco ( UCSF) kwa kujitolea kuelekea mpango uliolenga kuboresha huduma za afya.

SOMA: Kongamano la miaka 60 MUHAS laja kivingine

Amesema wahitimu ambao wamenufaika na elimu hiyo wataendelea kuhudumu katika hospitali, zahanati na jamii, wakitoa huduma ambayo sio tu ya ustadi bali pia huruma na mila ya kitamaduni.

Amesema uanzishwaji wa Chuo cha Walimu wa Afya Tanzania (THEA) inawakilisha dhamira yao kwa maendeleo endelevu ya kitaaluma ya waelimishaji wa afya nchini Tanzania na kwamba Itatumika kama kitovu cha ubora kutoa mafunzo, rasilimali, na usaidizi kwa waelimishaji wa taaluma za afya kuhakikisha kwamba wanasalia mstari wa mbele katika elimu ya taaluma za afya.

“Tunaposherehekea mafanikio haya, lazima pia tutambue changamoto ambazo zimesalia. Upungufu wa wafanyakazi wa kitaaluma, uhaba wa nyenzo za kufundishia na kujifunzia hasa vifaa vya TEHAMA, hitaji la mafunzo endelevu kwa kitivo kwa ajili ya utoaji wa mitaala inayozingatia umahiri na uboreshaji wa mazingira yetu ya elimu ni masuala ambayo ni lazima yashughulikiwe kila wakati kwa njia ya pamoja. Changamoto hizi si vigumu kuzishinda, lakini zinahitaji kujitolea kwetu kuendelea, azimio, umoja na ushirikiano,” amesema Prof Kamuhabwa.